Тэлеграм-канал Infotrans Media Belarus апублікаваў пост пра тое, што Польшча адкрые мяжу з Беларуссю 20 і 22 верасня. У Міністэрстве ўнутраных справаў і адміністрацыі Польшчы на пытанне «Еўрарадыё» паведамілі, што ім пра гэта нічога не вядома. Няма навін пра адкрыццё мяжы і ў Дзяржпамежкамітэце Беларусі.
«Польшча можа з 20 верасня адкрыць спачатку чыгуначныя пераходы з Беларуссю ва ўгоду кітайскім кантэйнерам. А з 22 верасня — аўтамабільныя пункты пропуску з Беларуссю. Такая інфармацыя з’явілася ў профільных тэлеграм-каналах па праходжанні мяжы са спасылкай на нямецкіх экспедытараў», — паведаміў 18 верасня Infotrans Media Belarus.
Пазней гэтае ж паведамленне пачалі распаўсюджваць расійскія прапагандысцкія СМІ, спасылаючыся на «Беларускае радыё».
У Міністэрстве ўнутраных справаў і адміністрацыі Польшчы на пытанне «Еўрарадыё» заявілі, што ім не вядома пра адкрыццё мяжы 20 верасня.
«Калі нешта зменіцца, мы вас праінфармуем», — падкрэслілі ў польскім ведамстве.
У Дзяржпамежкамітэце Беларусі РІА «Новости» паведамілі, што не атрымлівалі з Варшавы ніякіх апавяшчэнняў што да адкрыцця мяжы з Беларуссю.
«На гэты момант афіцыйнай інфармацыі пра аднаўленне працы польскіх пунктаў пропуску ад сумежнага боку ў Дзяржпамежкамітэт не паступала», — расказаў БЕЛТА афіцыйны прадстаўнік Дзяржаўнага памежнага камітэта Беларусі Антон Бычкоўскі.
Нагадаем, 9 верасня прэм’ер-міністр Польшчы Дональд Туск абвясціў пра рашэнне цалкам закрыць мяжу з Беларуссю апоўначы з 11 на 12 верасня. Ён патлумачыў гэты крок ростам правакацый з боку Расіі і Беларусі і сумеснымі вайсковымі вучэннямі «Захад-2025».
Мяжа была закрытая на няпэўны тэрмін. Міністр унутраных справаў і адміністрацыі Польшчы Марцін Кервіньскі, які падпісаў пастанову пра гэта, падкрэсліў, што польскі бок не мае намеру «трымаць мяжу закрытай нават адзін дзень без неабходнасці».
Пазней міністр замежных справаў Польшчы Радаслаў Сікорскі заявіў, што будзе ціснуць на свайго кітайскага калегу, каб той у сваю чаргу паўплываў на Расію і прымусіў яе спыніць «гібрыдную аперацыю» на беларуска-польскай мяжы.